Psa 119 | YomNWM | STEP | Lusakumunu kuidi bobo bandiatilanga mu zinzila ziawu zikambulu tsembolo, bobo bandiatilanga boso buididi mina mi Yave.

Psalms 119

Mina mi Yave midi mifuana

1 Lusakumunu kuidi bobo bandiatilanga mu zinzila ziawu zikambulu tsembolo,
bobo bandiatilanga boso buididi mina mi Yave.
2 Lusakumunu kuidi bobo bankebanga zinzengolo ziandi ;
ayi bakutombanga mu mintima miawu mimvimb ;
3 bavanganga ko kadi diambu di mbimbi,
bandiatilanga mu zinzila ziandi.
4 Ngeyo wuvana minsiku mu diambu
mikinzuku bumboti.
5 A bika zinzila ziama ziba zitelama dio ngui
mu diambu ndikizika zinzengolo ziaku ;
6 Buna ndilendi fua tsoni ko
bu ndiela keba zithumunu ziaku zioso.
7 Ndiela kuzitisa mu ntima wululama ;
banga minu ndilonguka mina miaku misonga.
8 Ndiela kinzika zinzengolo ziaku,
kadi tumbu ku ndiekula.
9 Buevi ditoko kalenda kebila nzilꞌandi yi vedila e ?
Mu zinganga boso buidi mambu maku.
10 Ndikutomba mu ntimꞌama wumvimba,
kadi tala ti ndivengama mu zithumunu ziaku.
11 Ndisimbidila mambu maku mu ntimꞌama
mu diambu ndibika vola masumu kuidi ngeyo.
12 Nzitusu kuidi ngeyo, a Yave
wundonga zinzengolo ziaku.
13 Mu bididi biama,
ndilembo tangi mina mioso mintotukanga mu munu aku.
14 Ndieti mona khini mu landakana zinzengolo ziaku
banga mutu wowo wumona khini mu kimvuama kiwombo.
15 Ndieti yindula minsiku miaku
ayi ndieti kinzika zinzila ziaku.
16 Ndieti mona khini mu zinzengolo ziaku,
ndilendi lenza ko mambu maku.
17 Vangila kisadi kiaku mamboti ayi mu ndiela zinga ;
ndiela tumukina mambu maku.
18 Zibula meso mama mu diambu mona
mambu matsiminanga mu mina miaku.
19 Ndidi nzenza vava mbata ntoto ;
kadi kutsuekila zithumunu ziaku.
20 Muelꞌama widi dilemina di ngolo ;
mu diambu di mina miaku mu zithangu zioso.
21 Ngeyo wunteminanga batu badi luniemo,
bobo basingu ayi bobo bavengama mu zithumunu ziaku.
22 Thatudila tsoni ayi dienzi
bila ndieti keba zinzengolo ziaku.
23 Ka diambu ko minyandi mivuendi va kimosi ayi mikuthubidila ;
kisadi kiaku kiela yindula zinzengolo ziaku.
24 Zinzengolo ziaku zinkumbonisanga khini,
zikuphananga zindongi.
25 Ndivuanda mu mbungi-mbungi ;
keba luzingu luama boso buididi mambu maku.
26 Nditangila zinzila ziama ayi ngeyo wuphana mvutu ;
wundonga zinzengolo ziaku.
27 Bika ndisudika malongi ma minsiku miaku ;
buna ndiela yindula matsiminanga maku.
28 Muelꞌama widi wuvonga mu kiadi,
wukhindisa boso buididi mambu maku.
29 Bika wuphengumuna mu zinzila zi luvunu ;
wumbonisa nlemvo mu mina miaku.
30 Ndisobula nzila yi Kiedika ;
nditula ntimꞌama mu mina miaku.
31 Ndidi wukangama mu zinzengolo ziaku, a Yave ;
kadi kumbika ndifua tsoni.
32 Ndilembo zawula mu nsolo wu zithumunu ziaku
bila ngeyo wuvuandisa ntimꞌama mu kiphuanza.
33 Wundongisa, a Yave, mu landakana zinzengolo ziaku
buna ndiela kuzikeba nate ku tsukulu.
34 Wuphana diela ayi ndiela keba mina miaku
ayi ndiela ku mikinzika mu ntimꞌama wumvimba.
35 Wuthuadisa mu nsolo wu zithumunu ziaku
bila muawu ndieti moninanga khini.
36 Balula ntimꞌama kuidi zinzengolo ziaku ;
vayi bika kuidi ndandu yi luvunu.
37 Botula meso mama mu bima biphamba ;
keba luzingu luama boso buididi mambu maku.
38 Dukisila kisadi kiaku tsilꞌaku,
muingi babaka bukukinzikila.
39 Vengumuna mvuezolo wowo ndilemou moni tsisi
bila mina miaku midi mimboti.
40 Phila phuila ndidi yi minsiku miaku ;
keba luzingu luama mu busonga buaku.
41 Bika luzolo luaku lungolo lutula kuidi minu, a Yave,
phulusu aku boso buididi tsilꞌaku,
42 buna ndiela baka bu vanina mvutu
kuidi mutu wowo wulembo kumfingi
bila nditula diana diama mu mambu maku.
43 Kadi tumbu botula mvimba mambu ma kiedika mu munuꞌama
bila ndintulanga diana diama mu mina miaku.
44 Ndiela tumukinanga Mina miaku kadika thangu
mu zithangu zioso ayi mu kadika mvu.
45 Ndiela diatilanga mu kiphuanza
bila nditomba minsiku miaku.
46 Ndiela yolukila zinzengolo ziaku va ntuala mintinu
ayi ndilendi fua tsoni ko.
47 Bila khini ndieti mona mu zithumunu ziaku,
bila ndieti ku zizola.
48 Ndimvumuna mioko miama kuidi zithumunu ziaku,
ziozi ndieti zola
ayi ndiela yindulanga zinzengolo ziaku.
49 Tebukila moyo mambu maku kuidi kisadi kiaku ;
bila ngeyo wuphana diana.
50 Mbombolo ama mu ziphasi ziama yawu yayi :
tsilꞌaku yeti kitula luzingu luama lumona.
51 Batu ba luniemo batsekinina ngolo boso buididi luzolo luawu
vayi ndisia vengama ko mu Mina miaku.
52 Nditebukila moyo mina miaku mikhulu, a Yave
ayi ndintambula mbombolo mu miawu.
53 Kiadi kimbuila mu diambu di batu bambimbi ;
bobo beti loza Mina miaku.
54 Zinzengolo ziaku ziawu zingudi zi mambu ma minkunga miama
ku kadika buangu kioki ndieti leka.
55 Nditebukilanga moyo dizina diaku va builu, a Yave,
ayi ndiela keba Mina miaku.
56 Diadi diba diambu ndisadila :
ndintumukina minsiku miaku.
57 Ngeyo kuku kiama, a Yave.
Ndivana tsila ti ndiela tumukina mambu maku.
58 Nditomba zizi kiaku mu ntimꞌama wumvimba,
wutsila nlemvo boso buididi tsilꞌaku.
59 Ndiyindula zinzila ziama
ayi nditadisa malu mama kuidi zinzengolo ziaku.
60 Ndiela tula nsualu ayi ndilendi zingila ko ;
mu diambu di keba zithumunu ziaku.
61 Ka diambu ko batu bambimbi bakhengi mu minsinga
vayi ndisia zimbakana ko Mina miaku.
62 Ndieti kotuka va midi miphipa mu kuvutudila matondo
mu diambu di Mina miaku misonga.
63 Ndidi nkundi wu batu boso bobo beti kukinzika
ayi wu bobo beti landakana minsiku miaku.
64 Ntoto wufulukidi mu luzolo luaku, a Yave ;
bika wundonga zinzengolo ziaku.
65 Vangila kisadi kiaku mamboti
boso buididi mambu maku, a Yave.
66 Bika wundongisa nzayilu ayi tsudukulu yimboti
bila ndiwilukila zithumunu ziaku.
67 Tuamina ndiba mu phasi, minu ndiba ndiengidi
vayi buabu ndieti tumimina mambu maku.
68 Ngeyo widi wumboti ayi momo weti vanga madi mamboti ;
bika wundongisa zinzengolo ziaku.
69 Ka diambu ko batu ba luniemo balembo bivisa nzitusu ama
mu mambu ma luvunu mu diambu diama
minu ndiela kebanga minsiku miaku mu ntimꞌama wumvimba.
70 Mintima miawu midi mi matadi ayi miwanga ko
vayi minu khini ndieti mona mu mina miaku.
71 Didi diambu di mboti kuidi minu mu monoso phasi
muingi ndilonguka zinzengolo ziaku.
72 Mina mitotukila mu munu aku milutidi mfunu kuidi minu
viokila zimili zimili zi bivanzi bi nolo ayi bi palata.
73 Mioko miaku miawu mikhubika ayi miphanga.
Bika wuphana tsudukulu yi longukila zithumunu ziaku.
74 Bika bobo beti ku kinzika bamona khini bu beti kumbona,
bila nditula diana diama mu mambu maku.
75 Nzebi, a Yave, ti mina miaku midi misonga
mu kikhuikizi ngeyo wumbonisa phasi.
76 Bika luzolo luaku lu ngolo luba mbombolo ama
boso buididi tsila yoyi wusila kisadi kiaku.
77 Bika kiadi kiaku kiba va minu mu diambu ndizinga
bila khini ndieti mona Mina miaku.
78 Bika batu ba luniemo bafua tsoni,
mu mambimbi beti kuphangila mu kambu bila
vayi minu ndiela yindulanga minsiku miaku.
79 Bika bobo beti ku kinzikanga babaluka kuidi minu ;
bobo beti sudika zinzengolo ziaku.
80 Bika ntimꞌama wuba wukambu tsembolo va ntuala zinzengolo ziaku
mu diambu ndibika fuisu tsoni.
81 Muelꞌama wuvongidi mu diambu di phuila yi phulusu aku ;
vayi ndintula diana diama mu mambu maku.
82 Meso mama mavongidi ; malembo tadidila tsilꞌaku ;
ndituba : “thangu mbi wela kuiza ku mbomba e ?”
83 Ka diambu ko ndidi banga kamununu ki vinu kitudulu va muisi ;
vayi ndisia zimbakana ko zinzengolo ziaku.
84 Nate thangu mbi kisadi kiaku kafueti vingidila e ?
Thangu mbi wela vanina thumbudulu kuidi batu bobo beti ku ndiamisa e ?
85 Batu ba luniemo bakebi mabulu ma mintambu mu diambu diama ;
buawu ko bobo buididi Mina miaku.
86 Zithumunu ziaku zioso zifueni mu tudulu diana ;
bika wutsadisa bila batu balembo ndiamisa mu kambu bila.
87 Keti fioti kuandi fisiala nganu bambotudi va ntoto ;
vayi minu ndisia loza ko minsiku miaku.
88 Keba luzingu luama boso buididi luzolo luaku
ayi ndiela tumukina zinzengolo zi munu aku.
89 Mambu maku, a Yave, manzingilanga mu zithangu zioso ;
madi matelama dio ngui mu diyilu.
90 Kikhuikizi kiaku kinzingilanga mu zitsungi zioso.
Ngeyo wukindisa ntoto ayi wawu wulembo zingila.
91 Mina miaku minzingilanga nate lumbu kiaku :
bila bima bioso bieti kusadila.
92 Enati Mina miaku misia kumbonisa khini ko
nganu ndibiva mu ziphasi ziama.
93 Ndilendi zimbakana ko minsiku miaku
bila mu miawu weti kebila luzingu luama.
94 Wuphukisa bila ndidi waku ;
nditomba minsiku miaku.
95 Batu bambimbi balembo mfiedi mu diambu bambunga ;
vayi ndiela yindula zinzengolo ziaku.
96 Mu kadika diambu di fuana, ndilembo moni ndilu ;
vayi zithumunu ziaku zisiko kadi ndilu.
97 A phila ndieti zodila mina miaku !
Miawu ndieti yindula mu lumbu kimvimba.
98 Zithumunu ziaku zikhitula mutu wu nduenga viokila bambeni ziama
bila ziawu zidi kaka yama mu zithangu zioso.
99 Minu ndieti luta sudika viokila minyiyisi miama mioso
bila ndinyindulanga zinzengolo ziaku.
100 Minu ndieti luta sudika viokila bakulutu
bila ndinkebanga minsiku miaku.
101 Ndikeba malu mama mu diatila mu woso-woso nsolo wu mbimbi
mu diambu dikeba mambu maku.
102 Ndisia vengama ko mu mina miaku
bila ngeyo veka wundonga.
103 A phila lueki mambu maku madi mu munu ama
viokila niosi mu munu ama.
104 Mbeki diela mu diambu di minsiku miaku ;
diawu ndinlendilanga woso-woso nsolo wu mbimbi.
105 Mambu maku madi muinda mu malu mama
ayi kiezila mu nsoloꞌama.
106 Ndinzenga ndefi ayi ndiyikindisa :
ti ndiela landakana mina miaku mi busonga.
107 Ndimona ziphasi ziwombo ;
keba luzingu luama, a Yave, boso buididi mambu maku.
108 Kikinina, a Yave, minsitusu mi luzolo mi munu ama
ayi wundongisa mina miaku.
109 Ka diambu ko kadika thangu ndieti nata luzingu luama mu mioko miama,
ndikadi zimbakana Mina miaku.
110 Batu bambimbi balekidi ntambu mu diambu diama,
vayi ndisia vengama ko mu minsiku miaku.
111 Zinzengolo ziaku zidi kiuka kiama mu zithangu zioso ;
ziawu zidi khini yi ntimꞌama.
112 Ntimꞌama wuvuendi mu kebanga zinzengolo ziaku
nate kuna tsuka.
113 Ndieti lenda batu badi mintima miodi,
vayi ndieti zola Mina miaku.
114 Ngeyo suamunu kiama ayi nkakuꞌama ;
nditula diana diama mu mambu maku.
115 Bika luthatukila beno batu lueti vanga mambu mambimbi ;
muingi ndikeba zithumunu zi Nzambi ama.
116 Bika wukhindisa boso buididi tsilꞌaku buna ndiela zinga ;
kadi tala ti diana diama dilalukusu.
117 Bika ngeyo wuba singumunu kiama ayi ndiela kulu ;
buna ndiela talanga zinzengolo ziaku mu zithangu zioso.
118 Ngeyo wuloza batu boso bobo beti zimbala mu zinzengolo ziaku
bila luvunu luawu luidi lu phamba.
119 Batu boso bambimbi ba ntoto,
ngeyo weti kuba vengumuna banga tsobo
diawu minu ndieti zodila zinzengolo ziaku.
120 Nsuni ama wulembo titi mu diambu di tsisi aku ;
thelimini mu boma bu mina miaku.
121 Ndivanga mambu masonga ayi mafuana
kadi kundiekula kuidi minyamisi miama.
122 Kubikila kisadi kiaku mamboti ;
kadi tala ti batu ba luniemo bandiamisa.
123 Meso mama mavongidi, malembo tadidila phulusu aku,
malembo tadidila tsilꞌaku yisonga.
124 Vangila kisadi kiaku mamboti boso buididi luzolo luaku
ayi wundonga zinzengolo ziaku.
125 Ndidi kisadi kiaku ; wuphana diela,
muingi ndisudika zinzengolo ziaku.
126 Thangu yifueni kuidi ngeyo mu sala, a Yave ;
mina miaku mibundukidi.
127 Bila ndieti zola zithumunu ziaku
viokila nolo, viokila kutu nolo yithalu ;
128 ayi bila ndilembo kinzika minsiku miaku mioso milulama
Ndinlendanga woso-woso nsolo wu mbimbi.
129 Zinzengolo ziaku zidi zi matsiminanga
diawu ndieti kuzitumukina.
130 Zaba ti mambu maku meti vana kiezila ;
meti vana diela kuidi batu baphamba.
131 Ndinzibula munu ama ayi ndivumuna
mu phuila yi ngolo yi zithumunu ziaku.
132 Baluka kuidi minu ayi wumbona kiadi,
banga bobo weti vangila mu zithangu zioso
kuidi bobo banzolanga dizina diaku.
133 Tuadisa zithambi zi malu mama boso buididi mambu maku,
kadi tala kadi disumu di ndiadila.
134 Wukhula mu kuamusu wu batu
mu diambu ndibaka bu tumukina minsiku miaku.
135 Kienzudila kisadi kiaku zizi
ayi wundongisa zinzengolo ziaku.
136 Matsuela mawombo malembo kumbi mu meso mama banga mila mi nlangu
mu diambu Mina miaku mikadi kinzuku.
137 Ngeyo widi wusonga, a Yave
ayi mina miaku midi milulama.
138 Zinzengolo wutula zidi zisonga,
zidi zifuana mboti mu siwulu diana.
139 Bufula buama mu kusadila bulembo tsukisa ntima,
bila bambeni ziama zisi zaba ko mambu maku.
140 Zitsila ziaku zimonika ti zidi zikiedika,
ayi kisadi kiaku wukuzizolanga.
141 Ka diambu ko ndidi mutu wuvumbama ayi wulenzu,
ndikadi zimbakana minsiku miaku.
142 Busonga buaku buidi mu zithangu zioso
ayi mina miaku midi mikiedika.
143 Ziphasi ayi maniongo bimbuididi,
vayi zithumunu ziaku zikumbonisanga khini.
144 Zinzengolo ziaku zidi zilulama mu zithangu zioso ;
wuphana diela muingi ndizinga.
145 Nditela mu ntimꞌama wumvimba ; wuphana mvutu, a Yave
ayi ndiela kinzika zinzengolo ziaku.
146 Ndikutela, wuphukisa
ayi ndiela keba zinzengolo ziaku.
147 Ndieti kotuka tuamina nkielo buisi wuba
ayi ndinyamikinanga muingi wutsadisa ;
minu nditula diana diama mu mambu maku.
148 Meso mama meti ba mazibuka tuamina khiesa yi builu,
mu diambu ndiyindula zitsila ziaku.
149 Wa mbemboꞌama boso buididi luzolo luaku
keba luzingu luama, a Yave, boso buididi mina miaku
150 Bobo beti kubika zikhanu zimbimbi bafikimini,
vayi thama badi ayi Mina miaku.
151 Muaki, ngeyo widi wufikama, a Yave
ayi zithumunu ziaku zioso zidi zikiedika.
152 Tona thama ndizaba, ndilongukala zinzengolo ziaku
ti ngeyo wumana zibieka mu zithangu zioso.
153 Bika wutala ziphasi ziama ayi bika wukhula
bila ndisia zimbakana ko Mina miaku.
154 Bika wunduanina ayi bika wukhula,
keba luzingu luama boso buididi zitsila ziaku.
155 Phulusu thama yidi mu diambu di batu bambimbi
bila batombanga ko zinzengolo ziaku.
156 Kiadi kiaku kidi kinneni, a Yave ;
keba luzingu luama boso buididi mina miaku.
157 Batu bobo beti kundenda badi bawombo ayi beti kundiamisa ;
vayi ndikadi vengama mu zinzengolo ziaku.
158 Ndieti kakumukina batu bobo bakambulu minu
bila batumukinanga ko mambu maku
159 Tala phila ndieti zodila minsiku miaku,
keba luzingu luama, a Yave, boso buididi luzolo luaku.
160 Mambu maku moso madi makiedika ;
Mina miaku mioso misonga midi mu zithangu zioso.
161 Minyadi mindiamisini mu kambu bila
vayi ntimꞌama wulembo titi va ntuala mambu maku.
162 Khini ndieti mona mu tsilꞌaku
banga mutu beki kiuka kinneni mu mvita.
163 Ndieti lenda ayi ndieti kakumukina luvunu
vayi ndieti zola Mina miaku.
164 Ndieti kuzitisa mu tsambuadi di zikhumbu mu lumbu
mu diambu di Mina miaku misonga.
165 Ndembama yiwombo yidi kuidi bobo banzolanga Mina miaku ;
kuisi ko diambu dimosi diba lenda buminina thutu
166 Ndilembo vingila phulusu aku, a Yave
ayi ndieti landakana zithumunu ziaku.
167 Ndieti tumimina zinzengolo ziaku
bila ndieti kuzizola ngolo
168 Ndieti tumimina minsiku miaku ayi zinzengolo ziaku
bila ngeyo zebi zinzila ziama zioso.
169 Bika yamikina kuama kutula va ntualꞌaku, a Yave
wuphana diela boso buididi mambu maku.
170 Bika ndombolo ama yitula va ntualꞌaku ;
wukhula boso buididi tsilꞌaku.
171 Bika bididi biama bisapika mu nzitusu aku
bila weti kundonga zinzengolo ziaku
172 Bika ludimi luama luyimbila mambu maku
bila zithumunu ziaku zioso zidi zisonga.
173 Bika koko kuaku kuba kukubama mu kutsadisa
bila ndisobula minsiku miaku.
174 Phuila yingolo ndiba mu mona phulusu aku, a Yave
ayi Mina miaku mikumbonisanga khini.
175 Bika ndizinga muingi ndizitisa
ayi bika mina miaku mitsimba
176 Ndidiengila banga nkangu wu mamemi mazimbala,
tomba kisadi kiaku,
bila ndisia zimbakana ko zithumunu ziaku.